城中鏡：着衫要襯老婆 鄧鉅明話辛苦
從事鐘錶行業三十幾年嘅太子珠寶鐘錶主席鄧鉅明，參與一連數天全亞洲最大型嘅「鐘錶與奇蹟」高級鐘錶展覽，對於香港如斯備受重視，佢感到好欣慰。佢更特別邀請咗一啲內地貴賓來港出席，仲有貼身服務包括名車接送出入、直升機觀賞景色等，當然唔少得同牌子合作，每晚設宴款待。
鄧鉅明笑說依家着衫好有要求，咁先襯得起太太喎！
現年五十八歲、事事親力親為嘅佢，話生意將來都係交畀第二代，包括兩個仔、哥哥嘅仔同姐姐嘅仔，難得年輕一代對鐘錶業甚有興趣。問佢有冇偏心呀？佢話：「會做到平衡，希望佢哋同心合力，唔好有任何摩擦，多啲聽別人嘅聲音，做嘢唔好怕蝕底，唔好成日搵人着數，最終得着都係自己。」佢又透露兩年多前太太鄧宣宏雁開始加入公司，擔任公司嘅副主席，而太太亦參與好多珠寶設計，佢笑住話：「我都辛苦o架，依家要配合佢，着衫要有要求，咁先襯番佢嘛！」
