城中鏡：名醫怨「霸道」難為了病人
佔中行動持續蔓延，集會人士封鎖路段除咗影響緊急救援外，原來連醫生診所都受影響。眼科醫生周伯展話病人為避開示威人潮，一度由金鐘避到去旺角就診，誰知火頭燒到去旺角，避無可避。皮膚科醫生史泰祖就擔心示威者逼爆中環，病人不敢登門，點知「佔中」最後變「佔鐘」，影響算輕微，執番身彩。
周伯展嘆病人為避佔中集會而左撲右撲，相當無奈。
「佔中」變「佔鐘」，史泰祖慶幸自己位於中環嘅診所未受影響。
趙麗娟話唔少會計師樓都變陣，將屋企變成辦公室，彈性應對佔中行動。
擔心無法依時應診
佔中行動無了期，好多名人尋日出席灣仔會展十．一酒會時都議論紛紛。周伯展話，佔中行動爆發首日，病人電話響爆，但為安全計，都係叫旗下金鐘診所嘅姑娘唔使返工，然後逐一聯絡病人更改診症時間，或改去旗下旺角診所。點知「佔鐘」急速蔓延到旺角，有病人嚇到旺角都唔敢去。
睇症大減，周醫生無透露損失幾多，但憂慮有病人因為集會封路無法依時應診，可大可小，呼籲集會人士見到病人出示藥袋或診症卡時，應該放行喎。史泰祖嘅診所都喺正皇后大道中，佔中未開始，佢已作最壞打算，點知示威者改為佔領金鐘，中環交通不算太壞。雖然有病人兜路行遠咗，但最終都去到佢診所喎。
會計界都為佔中行動作部署，會計師公會前會長趙麗娟話業界做嘢一向機動，唔少人將工作帶返屋企做，但講到見客就好頭痕嘞。前日佢返長沙灣寫字樓前，都先向同事查詢最新集會情況。
