設計圖片及對白
早前都講過，貿發局總裁Fred林天福過檔機管局任行政總裁。話說喺九月底嘅歡送酒會上，阿Fred笑言會趁上任前去機場視察下，但只係擔心自己搭錯車去咗會展返工。話咁快，佢尋日履新，當然冇返咗會展喇，仲第一時間參觀機場設施添！老實講，喺公布佢出任機管局行政總裁嘅時候，外界質疑佢缺乏航空經驗，唔知係咪因為咁，所以佢更加要惡補呢？
尋日佢去咗機場中央控制中心，了解機場二十四小時運作嘅情況，同埋機場運作規模以至當中嘅複雜性，而中心內嘅同事就向佢講解咗當機場運作受突發事故影響嘅應變措施等。喺咁短嘅參觀時間內，究竟佢了解咗幾多就唔知嘞，正如佢喺歡送會上引用阿里巴巴集團主席馬雲入股恒大足球隊時講「外行可以領導內行，但必須尊重內行」，嚟回應缺乏航空經驗嘅質疑，佢係咪真係做得到呢，大家真係要拭目以待嘞！
新上任當然要講吓未來嘅首要工作，阿Fred都唔例外，佢話將集中喺三方面，包括維持機場高效運作，規劃同發展項目，以及招攬同培訓人才。
跟住佢又話確實有迫切需要擴建機場，並積極推進多項短、中、長期發展計劃，包括中場範圍發展、北商業區發展同建議進行嘅三跑道系統計劃。聽落佢冇好硬銷三跑喎，唔通因為早前好多環團大力反對有關計劃，唔想再刺激佢哋？
第一手消息請下載on.cc東網
