依家佔中行動示威者佔據中區唔少主要道路，有立法會議員就話呢兩日無論開會定出席活動都一波三折、困難重重。保險界議員陳健波話，日前去立會開會時要兜遠路步行前往，尋日去灣仔會展出席十．一升旗禮及酒會活動時，更一度被困鐵馬陣內，出唔到又入唔到，仲要被示威者鬧添！

陳健波

陳健波話尋日早上前往會展舊翼，因正門無法進入，遠遠看見工聯會理事長吳秋北同一名示威者正在交談，以為該路可行，點知行咗過去先知此路不通，想折返時就被示威者嘅鐵馬擋住去路，於是佢行去移開鐵馬，期間同一名示威者對峙並發生口角，最終要由保安帶領下才順利進入會場。

不過，佢話相信好多示威者都係有理想嘅，只有極少數係不理性，同時佢亦好體諒警察嘅工作，覺得市民唔應該因為個別警察嘅行為或言論，而批評整個警隊；又話見到唔少警察須徹夜留守，於街上睡覺，希望市民明白警察係好難做兼好大壓力喎。

第一手消息請下載on.cc東網iPhone/iPad/Android/Windows Phone Apps