李豐年話通勝有好多學問同有趣地方。
好多人都有查通勝嘅習慣，尤其對部分行業如糧油出入口商來說，當中二十四節氣同每日宜忌事項更特別有參考價值。人稱「糧油大王」嘅明泰食品董事長兼首席執行官李廣林，每年都有向市民免費派發自家撰寫嘅通勝，日前我哋喺一個活動上見到佢個仔李豐年，原來佢接手家族糧油生意之餘，對爸爸嘅通勝亦略有研究。
李豐年話細個時因為反叛，總係唔鍾意聽爸爸教，尤其要佢學通勝呢類咁傳統嘅學問，當然就更加冇興趣喇。
不過，隨住佢接手做家族生意之後，就多咗好多機會睇通勝，事關唔同節日氣候都同稻米等穀物收成息息相關，所以通勝記載嘅資料就成為佢預計貨源嘅重要依據，留意得多，逐漸發現通勝好多有趣嘅地方同知識添！
李豐年仲透露，通勝唔單止成為咗佢同朋友茶餘飯後嘅話題，有時佢客串做活動或婚禮主持嘅時候，更加可以藉此分享唔同節日嘅典故同來源，將有關傳統一直流傳下去。
第一手消息請下載on.cc東網
