呢幾日佔中行動繼續發酵，社交網站連日來被佔中消息洗版，但尋日就發現立法會會計界議員Kenneth梁繼昌貼咗張另類嘅相片，相中有人手持一舊長條形嘅啡色物體，佢仲形容為「a piece of sh_t！」添！當然Kenneth只係講笑啦，睇埋下文，先至知呢條啡色物體係環保煤炭。
喺德國交流期間，梁繼昌同當地人士分享對香港政治發展嘅睇法。（互聯網圖片）
梁繼昌喺社交網站戲稱德國環保煤炭為「a piece of sh_t！」（互聯網圖片）
佔中資訊阻睡眠
原來Kenneth由上月底開始去咗德國公務訪問，同當地政商界交流政改、法律改革、金融、能源等議題，相中嗰條啡色物體就係佢參觀柏林一間回收公司時見到嘅環保煤炭。Kenneth話此行獲益良多，增加咗佢對當地廢物處理系統嘅認識。
睇番Kenneth喺德國嘅行程都幾緊密，包括去法蘭克福參加商界聚會、金融界高桌晚宴、外交界聚會，以及同德國國會副議長同人權委員會主席等人會面等。
Kenneth話喺柏林嗰兩晚都瞓得好少，因為手機入面嘅即時通訊軟件不斷傳嚟佔領政總嘅最新資訊，搞到佢心掛掛喎！
第一手消息請下載on.cc東網
