黑金政客現眼報 民望插水有排衰
善有善報，惡有惡報，時辰一到，統統都報。嗱，壹淫媒主席黎智英被踢爆兩年來向泛民政客秘密捐款四千多萬元，捲入醜聞嘅牛鬼蛇神全部搞到一身蟻，淫賤黎固然被廉署請去飲咖啡，而嗰班黑金議員亦民望急速插水，呢啲咪叫現眼報囉。
有民調機構就立法會議員表現進行民意調查，以一分為最低，六分為最高分，發現大部分泛民議員嘅評分都出現下跌，黑金醜聞嘅主角更加統統榜上有名添，好明顯就係一次民意大審判喇。喺呢班「失分」議員之中，以一直否認收受捐款嘅公民黨毛孟靜最慘烈，同上次比較下跌零點三二分，只得二點六三分，而分別聲稱代人收錢嘅梁國雄同梁家傑，評分亦雙雙下跌至二點八分及二點九九分。至於將一百五十萬元黑金「袋住先」幾個月嘅工黨李卓人，評分勉強維持不變，可能係扮可憐呃到人啩。其他泛民議員嘅評分同樣集體下滑，今次真係同坐一條船，攬住齊齊死咯。
黑金醜聞曝光至今兩個月，泛民政客一直死雞撐飯蓋，唔係厚顏無恥死口唔認，就係下流無賴滿口託詞，簡直當市民係白癡。依家民意昭昭，收錢議員民望全線下挫，分明係市民用評分投下不信任票，唔知佢哋又有乜嘢狡辯呢？正所謂，衰開有條路。泛民政客今次民望坐滑梯，分分鐘係序幕嘅咋，你知啦，隨着淫賤黎黑金醜聞愈揭愈臭，收錢議員嘅虛偽面具亦逐一剝落，李卓人早前已經被廉署登門入屋搜證，遲啲話唔埋有更多同路人受查甚至落鑊，到時咯喎，反對派誠信徹底破產，民望想唔趴街都幾難吖。
所以話，香港搞到今時今日呢個局面，唔係無原因o架。眾所周知，淫賤黎係公認嘅外部勢力代理人，同自認「日日做漢奸」嘅李柱銘、陳方安生等人合稱「搞事四人幫」，專門反中禍港，唯恐天下不亂，泛民議員沆瀣一氣，暗中收黑金充當佢哋嘅政治工具，香港點可能唔亂過亂世佳人吖。呢，佔領中環被指幕後有外部勢力介入，家陣搞到七國咁亂，唔知點樣收科，香港真係多得呢班政棍唔少咯。
當然啦，立法會有名你叫「垃圾會」，其他政客都唔好得幾多，一樣狼狽為奸，一樣神憎鬼厭。講起認真令人心酸，香港妖孽當道，議員不務正業，街頭亂七八糟，咁搞法，點可能唔急速沉淪吖，叮！
