城中鏡：鄭兆良借出值700萬鑽飾婆婆行Catwalk圓夢

能夠投身理想行業最幸福，無奈有時總有人遺憾。仁濟醫院旗下方若愚長者鄰舍中心早前舉行一場另類時裝騷，十幾位婆婆齊齊着上由舊衫改造嘅時裝，扮演佢哋夢想職業兼行Catwalk。仁濟醫院副主席林煒珊（Vanessa）都有到場支持，佢話自細嘅夢想係做時裝設計師，可惜長大後只係入行兩個月，就已經夢醒嘞！

鄭兆良（中）與各種扮相嘅婆婆合影，左一為穿戴七百萬元鑽飾嘅珠寶代言人。

林煒珊（左）自爆夢想成真後旋即夢醒嘅趣事。中及右分別為仁濟醫院主席蘇陳偉香及知專設計學院設計系主任Elizabeth Mclafferty。

廖偉芬（中）及羅穎怡（左）拍住上搞活動，仁濟醫院總理兼廖偉芬表妹湯振玲（右）到場打氣。

話說Vanessa當年修讀設計後即投身殿堂級設計大師Alexander McQueen旗下，點知大師鬼才洋溢超高班，Vanessa自認唔夠天分，做咗兩個月即知難而退，疊埋心水返香港幫手打理家族時裝生意，總算係實現咗夢想。

展現長者漂亮一面

今次時裝騷係創興銀行家族後人廖偉芬（Jennifer）創辦嘅升級周末坊最新搞作，Jennifer仲邀請著名時裝設計師鄭兆良（Barney）帶領香港知專設計學院設計系學生，一齊幫婆婆們完成心願。

其中有位婆婆嘅心願係做珠寶代言人，Barney見升級改造後嘅桃紅色衣裳靚就靚嘞，但係珠寶欠奉，佢又唔想叫婆婆戴「朱義盛」，於是慷慨借出一套價值達七百萬元嘅自家設計靚鑽首飾，氹到婆婆行騷時掩不住開心，真正經歷成為全場焦點女主角嘅閃耀時刻。

仁濟醫院總理兼羅氏針織後人羅穎怡（Wendy）都有出席，佢創辦嘅志願機構W World基金亦有份參與籌辦今次嘅活動。Wendy話，今次係基金成立以來第一次活動，希望展現長者漂亮的一面。