政壇：搞搞政：富貴黨焗鍾國斌轉軌玩直選？
距離二○一六年立法會選舉仲有兩年，各政黨已經密密部署招攬同路人，或培訓第二梯隊接棒，自由黨都有部署，立法會議員田北俊（田少）早已向外吹風玩埋今屆就退下火線，仲多次公開表示有意「欽點」工業界議員林大輝接手，但大輝一直扭扭擰擰。眼見黨內僅餘有潛質接棒嘅第二梯隊又未成熟，最新繼任目標居然係紡織及製衣界嘅鍾國斌（Felix）。
設計圖片及對白
功能界別舒服 未必肯制
據悉大輝早已成為招攬對象，獲力邀出戰新界東直選，仲連黨魁都有得做添，不過，大輝直到依家都未決定。為免時間太遲，搞到直選之路不通，該黨目前唯一希望就放咗喺Felix身上，佢哋覺得Felix年輕、中產，喺立法會浸咗兩年形象都唔錯，起碼講得兩嘴，亦好落力為中小企發聲，係下屆直選合適人選。
不過，據知Felix自覺喺功能界別坐得不知幾開心，若果一六年選舉規則不變，大可以舒舒服服咁坐多屆，二○二○年先諗都未遲，所以要焗Felix上橋，似乎有難度，睇嚟要再落啲工夫至得嘞！
另一個人選就係該黨青年團主席李梓敬，不過，黨內有感李梓敬除咗係青年團主席，連區議會選舉都要等到明年先有得打，擔心佢未成熟就出去打立法會選舉呢場硬仗盞浪費彈藥，有意培養多幾年，等佢「大個仔」先再諗。
