政壇：美股勁 朱克伯格身家暴漲
《福布斯》近日公布嘅本年度美國400大富豪榜，除咗微軟創辦人蓋茨以810億美元身家，連續二十一年霸佔榜首外，若睇身家上升速度，首六名進帳最多嘅富豪中，除咗股神巴菲特外，全部都係I.T.人，當中社交網站facebook（fb）創辦人朱克伯格身家更暴漲150億美元！
朱克伯格去年身家升幅稱冠。（資料圖片）
豬籠入水多I.T.人
其實，受惠美股牛氣沖天，富豪身家水漲船高，令入榜門檻升到去15.5億美元，係《福布斯》一九八二年開始編纂呢個富豪榜以來最高。朱克伯格喺榜內排名11，身家340億美元，睇番fb股價，雖然前年上市後沉寂一時，但過去一年可謂節節上升，帶挈佢份身家較去年勁升150億美元。
以身家升幅奪亞季軍位置嘅係蓋茨同甲骨文行政總裁埃利森，身家同暴漲90億美元；Google孖寶佩奇同布林過去一年身家就漲咗66億美元，升幅分別排第五和六位，緊隨巴菲特之後。
綜觀榜上400名美國富豪，身家合共達2.29萬億美元，較去年多咗2,700億美元，平均身家57億美元，亦係歷來最高。
