政壇：鄭承隆倡黃溝藍變綠色
佔中運動一發不可收拾，參加者個個都以黃絲帶作宣傳，另一邊廂，警方要維持社會秩序，早前出動催淚彈轟散示威者，又被批評過度暴力，結果，撐警一族又以藍絲帶作號召，社會分歧，連絲帶都要鬧「顏色革命」，身兼獨立監察警方處理投訴委員會（監警會）成員嘅仁濟醫院前主席鄭承隆（Edwin），尋日就搵到第三條路，佢自製咗隻綠絲帶，希望大家可以更包容，話咁樣先可以彼此都可向前走喎。
設計圖片及對白
各界對於警方執法手法有唔少意見，政界中嘅分歧尤其大。日前，前保安局局長、現行政立法會議員葉劉淑儀就力排眾議，撐警員當日有必要用武力，又指示威者推水馬、拆欄杆都唔係「省油的燈」，葉太同紀律部隊關係深厚，撐警員真係唔出奇，巧合嘅係，月初要求退出新民黨嘅Edwin亦同佢有相似嘅睇法噃。
寓意政改「開綠燈」
Edwin尋日喺個人社交網站上載咗一張「綠絲帶」嘅圖片，點解係綠色？Edwin解釋，藍絲帶係支持警方執行合法指令，黃絲帶則係支持年輕人獨立思考、和平表達訴求，但兩者依家壁壘分明，令香港陷入分裂，若果港人想政改「開綠燈」，就應該將黃溝藍，咁樣政改才有機會變為綠色。照佢咁講，即係警方要撐，但亦應理解示威者，佢哋雙方只有彼此走近，香港先有走出困境嘅一天。
其實，小小一條絲帶，只係畀人賦予咗唔同嘅代表、唔同嘅意思啫。Edwin借絲帶講心底嘅憂慮同期望，都算有心思啦，唔講唔知，身兼監警會成員嘅佢，早兩日都去過政府總部附近視察，仲因為「佔領中環」行動搞到寸步難行添，或者係咁，更加心有體會啩！
