財神爺望而卻步 黃金周難見黃金
黃金周又到嘞，往年呢個時候，內地豪客爭相來港消費，商家笑到見牙唔見眼。可惜吖，今時唔同往日，香港正值多事之秋，尤其係佔中立立亂，趕客效果顯著，呢個黃金周唔褪色至奇。
唔係杞人憂天o架。嗱，近排有酒店預訂網站調查發現，台灣係今年「十．一」黃金周期間最受內地旅客歡迎嘅目的地，而香港嘅排名就插水式急挫，由對上一次調查嘅冠軍，變咗做梗頸四。香港三甲不入，畀南韓首爾同泰國曼谷爬咗頭，真係羞家咯。
春江水暖鴨先知，本港旅遊業界人士已經察覺形勢不妙。有旅行社組織估計，佢哋今年黃金周嘅入境團數目會比舊年少兩至三成，原因除咗內地客中好多都係水貨客之外，鄰近旅遊城市大幅降價搶客，吸引咗內地旅行社嘅注意力，加上內地人時興本土遊，都令到本港嘅旅遊優勢逐漸喪失。旅遊業議會預期，往年黃金周內地旅客升幅一般至少有一成半，今年可能放緩到百分之八左右，增幅少咗近半。
一榮俱榮，一損俱損，旅遊業前景堪虞，餐飲零售業界對未來市道同樣睇淡，紛紛敲響警鐘。原因好簡單，內地反腐風暴愈刮愈猛，消費模式因而改變，一擲萬金嘅豪客買少見少，多數「錫」住荷包。有金舖預計，今年黃金周生意額會比舊年同期大跌四成。政府統計數字更顯示，本港零售銷售額由今年二月起，已經連續錄得六個月負增長。旅客減少，加上消費力下降，業界冇啖好食，都咪話唔得人驚。
香港自詡好客之都，點解對內地旅客嘅吸引力逐漸消失？除咗中港矛盾加劇，搞事者驅蝗、拖篋等過激行動令同胞有貼錢買難受嘅感覺，對香港望而卻步，旅遊業硬件發展緩慢，配套嚴重不足，同樣令到競爭力每況愈下。
呢，香港旅遊景點多年冇增加，來來去去都係嗰幾個地方，一啲新鮮感都冇，有旅遊作家就批評本港根本冇乜地方可以再返嚟玩，難以吸引回頭客，建議本港利用極佳地理優勢，發掘潛力。業界有良好願望當然好，弊在撞正班尸位素餐、唔踢唔郁嘅港產官僚，盞嘥氣喇。
所以話啫，面係人哋畀，架係自己丟，黃金周不見黃金，港府自己攞嚟衰嘅咋。計太一叮話齋，港府施政無能，發展旅遊不力，搞到業界怨聲四起，當局不如將計就計，就住家陣佔中熱潮推出特色旅遊，推介本港示威文化、騷亂文化，話唔定可以吸引另類遊客添，叮！
