城中鏡：Harry哥哥教仔女玩魔術減壓

本身係魔術師嘅著名兒童電視節目主持人「Harry哥哥」王者匡，尋日出席玩具連鎖專門店嘅活動，佢透露喺玩具中攞到唔少新靈感，亦可借玩具去鼓勵小朋友讀好啲書、考好啲試，不過父母嘅互動更重要，可以透過玩具學到更多新事物。

Harry哥哥即場用玩具表演魔術。

問到有冇培養三個仔女學習魔術呀？Harry哥哥話：「一定有，三個都好鍾意，生活咁大壓力，魔術可以令人放鬆，跳出一個冇壓力嘅圈圈。」

佢又話近日將再度同香港管弦樂團合作，亦有意發展適合小朋友們欣賞嘅電台同電視台，畀機會小朋友發聲咁話喎。