城中鏡：新地跑樓梯 玩到去上海

醫生：向上跑唔傷膝

新地副董事總經理黃植榮話今屆賽事除咗為籌款之外，仲希望能夠吸引多啲人去體驗跑樓梯嘅好處，所以今屆賽事會新增青年組嘅隊際接力賽，以及「滿FUN體驗」組鼓勵十歲或以上小朋友同父母一齊參加。

好多人都驚跑樓梯會傷膝，但大會嘅諮詢醫生麥耀光就話落樓梯時膝頭承受體重嘅三倍，確實唔好，但上樓梯就唔會傷膝。而跑樓梯一個鐘可消耗五百卡路里，每日跑兩段樓梯，一年就可以減肥六磅，兼鍛煉心肺可延年益壽，係一項唔錯嘅運動。

現時垂直馬拉松世界巡迴賽女子組第一名Suzy Walsham就話，佢每星期會練習八至九次，除咗跑步做Gym，仲會去搵條樓梯嚟跑。佢話香港咁多高樓大廈，大家唔應該浪費，仲畀個貼士大家，做多啲下蹲嘅肌肉訓練，有助上樓梯快啲。