城中鏡：水禾田盼港人 融和展歡顏

連日示威集會處處，但無阻「福幼基金會」前晚如期舉行二十年籌款晚宴，多位名人因交通擠塞，姍姍來遲。身為「福幼」董事嘅水禾田臨開席前才到達。佢話早上一度拿起相機，由中環寓所徒步至金鐘，想話見證大時代場面，但行到去金鐘外圍時遇上警員，先知道嗰度已被封鎖。

雖然「食白果」，但水禾田話唔介意，更希望幫港人「療傷」：「好想做番啲嘢令港人笑番、開心番，社會需要融和。」佢即場拿起一件為「福幼」籌款的卡通笑面T恤，上面用英文寫上「健康、快樂、自由」，佢話港人依家最需要係呢「三寶」，希望大家和衷共濟，不再撕裂。

項明生尊重同事示威

旅遊作家項明生都話心痛示威一發不可收拾，盼事件盡快完結，佢公司都有員工加入聲援，佢就未有參與，但會尊重同事嘅決定。

講番「福幼」，過去二十年扶助內地貧困兒童，董事蘇蔡潔蓮話佢哋幫助內地殘疾兒童復康，又扶助農村學童上學，但明年初會喺本港開設中醫館，以贈醫施藥方式幫助弱勢社群。觀瀾湖集團副主席朱鼎耀都支持助學，過去幾年一直有在內地建校扶貧，畀小孩讀書識字機會，擺脫貧窮命運。