這個沒有認受性的香港廢柴政府竟在世界傳媒鏡頭下公然發放八十七個催淚彈突擊手無寸鐵的市民，不單只令全港有良知的正常人怒爆，更讓國際媒體大事報道，直指中共政權「插手」干預香港內部選舉，破壞「港人治港」的原則規定，有違《基本法》和《中英聯合聲明》。

在此舉世震驚的粗暴惡行面前，香港有件掃把頭竟在電台話呢啲唔係「暴力」，而係「武力」，又說若在英美，示威者早已被「騎警」用棍亂摳喎！有如斯立法會議員，呢個社會怎會不沉淪？

至於警方，有個發言人話佢麾下嘅警隊只係用「最低嘅武力」，及已「保持克制」的了！吓！用消防水喉咁粗嘅胡椒水炮近距離兜口兜面噴落市民塊面度，又見差佬用警棍發顛咁亂扑，咁叫「克制」，講嘢假唔假啲呀？難怪佢話發射的叫「催淚煙」，而不是「催淚彈」了！佢仲話，射「催淚煙」係唔想有人受傷喎！吓！我哋可從電視畫面見到當催淚彈「炸」落人群中時，火光熊熊地爆炸個喎！

即使沒有「燒着」人啲衫，大家亂走，咁多人，好易人踩人，蘭桂坊式死得人多啫！佢解釋「催淚煙」射遠處人群中，是因為係「夠人多」喎！前面用胡椒噴就得嘞！但全世界也看到最前面的市民，一直係高舉雙手示意和平不反抗的，啲差佬也狂噴重劑量的「噴漿」，真唔知邊個至係真正的「暴徒」？

如果有記者被催淚彈擊中，一度失去知覺倒地，條數點計先；老老實實，今次呢劑「大暴動」，香港廢柴政府管治無方，一定要有人問責的，請問誰要下台，平息民憤？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps