尋日喺香港中華出入口商會舉行嘅十．一酒會，見到副會長貝鈞奇手上有個好得意嘅彩色印水紙紋身圖案，原來佢五日前被信興集團副主席蒙德揚拉咗去睇水球比賽，仲話要整個印水紙落佢塊面度，但佢費事出席活動唔方便，所以就印落隻手度算嘞。不過，佢笑笑口話呢幾日係有沖涼o架！

貝鈞奇早年行過船，但竟然唔識游水。

原來啲印水紙好襟用，無論點用皂液洗手，手上嘅香港水球隊標誌同文字都洗唔甩，佢仲話蒙德揚搵咗班靚女水球員教咗佢好多水球知識添！講到水，貝鈞奇以前曾經有五、六年行船經驗，但佢自爆唔識游水，仲話當年喺船上只係擔任無線電操作員，屬於文職，所以豁免考水試嗰關喎。

第一手消息請下載on.cc東網iPhone/iPad/Android/Windows Phone Apps