李宗德話大埔LuLu以前係和富大埔球隊其中一個贊助商嘅公關職員。
相信好多人都認識被網民封為估波「燈神」嘅「大埔LuLu」董嘉儀，尋日咁啱遇到本地「港超聯」足球隊「和富大埔」會長Joseph李宗德，先講起原來佢同LuLu已經識咗好耐。Joseph透露，LuLu本來係和富大埔其中一個贊助商嘅公關職員，不時都要出席和富大埔嘅球賽同活動，久而久之，大家合作耐咗就對球隊有感情，LuLu亦成為佢哋球隊嘅粉絲。好似早幾日咁，LuLu就有特登去支持佢哋球隊比賽喇！
「大埔LuLu」董嘉儀被網民封為估波「燈神」。(資料圖片)
Joseph承認LuLu確實係佢哋球隊嘅其中一個焦點。咁會唔會有興趣邀請LuLu加入成為佢哋球隊一分子，幫球隊做推廣工作呢？
佢就話目前大家都只係朋友關係咁支持吓，雖然佢哋睇住LuLu由剛投身社會嘅小女孩，變得愈來愈成熟穩重，都感到非常安慰，但見LuLu都幾享受依家嘅生活，所以又冇諗過搵佢過檔喎。
第一手消息請下載on.cc東網
