政壇：傳庫克十月訪清華 乘機促銷iPhone 6
iPhone 6同6 Plus炒價好似坐過山車一樣，搞到班本港炒家坐唔安、食唔樂，大家最想知嘅，就係iPhone 6到底幾時先會正式進入內地市場。尋日內地傳蘋果公司CEO庫克受清華大學邀請，會喺十月二十三號訪華，因為時間敏感，市場預計佢今次行程，大有可能係為配合iPhone 6嘅推出，專程到內地進行「督師」，到時仲隨時加插「參觀門市」之類嘅行程，幫iPhone 6同6 Plus促銷。
庫克
早前市場傳出內地會喺十月十號正式發售iPhone 6同6 Plus，最平嘅機款叫價由5,288人仔起跳，消息令本地炒家勁驚今次會「炒燶機」。
之不過，騰訊科技尋日又引述三大電訊商嘅消息話，如果真係十號發售，依家應該已經收到蘋果通知提前做好準備，但係依家蘋果仲係冇聲氣，相信係流料居多。仲有電訊商推斷話照規定流程睇，iPhone 6同6 Plus最有可能發售嘅時間會係十月尾、十一月頭。
今次庫克傳出應邀喺十月二十三號訪華，出席清華大學經濟管理學院顧問委員會會議，因為時機巧合，引發市場諸多聯想。有人覺得佢今次訪華醉翁之意不在酒，九成九係為iPhone 6進入內地市場「督師」，萬一到嗰時工信部都仲未完成入網許可證審批，庫克就可以親自出馬，展開一輪政府公關，為新機上市排除所有障礙啦。
