政壇：捲獻捐醜聞 泛民跣鑊甘

有民意調查機構啱啱發表有關受訪市民對立法會議員表現評分嘅調查結果，發現大部分泛民議員嘅評分都下跌，當中捲入肥佬黎政治捐款嘅公文袋議員「阿毛」毛孟靜同「袋巾傑」梁家傑、白鴿黨涂謹申同社民連議員「長毛」梁國雄都榜上有名。

肥佬黎喺七月下旬被揭發向多名泛民人士、包括立法會議員秘密捐款，搞到班泛民議員都周身蟻，上月底廉署仲就有關醜聞去咗肥佬黎屋企搜證添，有傳呢次調查行動令相關人士人心惶惶。咁啱香港研究協會喺今個月十五至二十三日，以電話訪問咗1,002位市民，問佢哋對於立法會議員表現嘅評分，以一分為最低分，六分為最高分，調查結果正正發現多位捲入醜聞嘅議員評分都有下跌。

其中一直否認有收過肥佬黎政治捐款嘅阿毛，評分跌得最多，同六月底至七月初嘅同類調查比較下跌零點三二分，得二點六三分。至於分別聲稱代社民連同真普聯收取捐款嘅長毛同袋巾傑，評分就分別為二點八分及二點九九分，兩人分別下跌零點二九分及零點二一分。而聲稱係代工黨收取一百五十萬元，但又將捐款「袋住先」幾個月嘅李卓人評分就冇變，唔通「袋住先」好聽啲？

對議員表現多未滿意

政治捐款醜聞嚴重打擊泛民形象，除咗幾位捲入政治捐款醜聞嘅泛民議員民望下跌外，其他多名泛民議員嘅評分亦同樣下滑。十八名地區直選嘅泛民議員當中，有十二名評分都下跌，下跌幅度由最少嘅零點零一分至最大嘅零點四分。雖然負責調查嘅香港研究協會就冇明確分析泛民議員評分下跌嘅原因，但協會負責人就話，大部分議員評分都唔夠三分，可見市民對議員嘅工作表現仍然未感滿意，促請議員改善工作表現喎。