任人唯親聘洋官 西九醜聞一籮籮
開講有話，防民之口，甚於防川。前特首曾蔭權爵士嘅愛將、前運輸及房屋局常任秘書長栢志高今年四月退休，離任不足半年就被委任為西九文化區管理局營運總裁，完全無視高級公務員「過冷河」三年嘅規定，引起公眾嘩然。「東方報業民意調查」顯示，大部分受訪者批評當局明益自己友，用人標準透明度低，證明公道自在人心。
嗱，按照當局規定，高官退休後有一年禁制期，三年過冷河期，栢志高極速翻閹，話背後冇景轟喎，搵鬼信咩。可惜吖，面對公眾質疑，公務員事務局顧左右而言他，以「不願評論個案」敷衍民意，難怪有四成七受訪者擔心開壞先例，容易造成延後利益；兩成九人認為有利益衝突之嫌；一成八人更直指冷河期形同虛設。
真係諗極唔明，栢志高到底有咩把炮，當局對佢咁器重呢？雖然當局口口聲聲話栢志高喺公共行政領域服務超過三十年，經驗豐富，問題係西九係文化藝術項目，佢完全無相關工作經驗，試問外行點領導內行？再講吖，佢喺貪曾求見前教宗本篤十六世嘅醜聞中穿針引線，個人品格備受質疑。正如上述民調顯示，三成七受訪者認為栢志高外行領導內行；三成人指添煩添亂；兩成八認為涉黑箱作業。
講開又講，當局迷信洋和尚會唸經，結果次次都搞到一鑊泡，淨係一個西九文化區管理局之嘛，屢聘洋人，屢爆醜聞，喺洋人主持下，西九項目既延誤又超支，當局唔單止冇認真檢討，節省成本，反而疊床架屋設新職，徒然浪費公帑，咁樣唔係反智又係咩呀？
更加不堪嘅係，港府近年經常翻閹退休高官，甚至連臭名遠播嘅前食衞局局長周一嶽都獲翻閹為平機會主席，搞到公營機構淪為退休高官俱樂部。鬼咩，港府官官相護，一味維護小圈子利益，外人根本冇公平競爭嘅機會。好多人批評港府管治班子拉雜成軍，濫竽充數，唔係冇道理o架。
正如古人話齋，名正則治，名喪則亂。社會陷入政治狂熱，加上港府用人唯親，任人唯庸，施政梗係寸步難行喇。人貴有自知之明，香港一向被譏為文化沙漠，港府好大喜功，揚言要將西九打造成世界級文化藝術中心，結果醜聞多多，自取其辱。一句到尾，與其繼續浪費公帑，不如索性將西九轉為地產項目，為庫房增加收入好過啦，吓話！
