潮流興環保，但唔係人人都做得到。話說尋日中午氣溫達攝氏三十二度，一班官員同議員喺黃大仙廣場參與政府人員協會同工聯會舉辦嘅職安健嘉年華儀式，烈日當空下，個個都大汗疊細汗。

黃國健帶埋毛巾嚟抹汗，夠晒環保。

現場所見，工聯會嘅立法會九龍東直選議員KK黃國健就好醒目，早有準備帶咗條毛巾抹汗，環保得嚟又唔驚甩到成面紙巾碎。佢話呢個習慣已經持續咗好幾年，有時忙起上嚟走幾場，仲會帶兩條毛巾出街添！

不過，同場嘅工聯會立法會勞工界議員郭偉強同新界西直選議員麥美娟就只係用紙巾抹汗，KK笑笑口話要教訓佢哋喎。郭偉強就解釋，話自己有敏感，毛巾抹完再抹會擴大敏感範圍，所以先焗住用紙巾啫。

第一手消息請下載on.cc東網iPhone/iPad/Android/Windows Phone Apps