城中鏡：中大金禧慶 融匯校友情
中文大學嘅金禧之喜，繼栽種樹木慶祝後，近日再收到一份生日禮物。五位校友找嚟中國著名雕塑家吳為山教授造了一座巨型雕塑，名為「融匯」。
沈祖堯（左三）與名雕塑家吳為山（右三），及四位校友陳志新（左一）、張煊昌（左二）、殷巧兒（右二）及梁英偉（右一），齊見證「融匯」揭幕。（受訪者提供）
三米高的雕塑「融匯」，豎立喺中大金禧校友園中央。（受訪者提供）
賀禮日前送抵校園，中大校長沈祖堯與吳教授齊主持揭幕，仲請來醒獅隊助興。三米高嘅「融匯」放置喺「金禧校友園」中央，由青銅與不銹鋼結合打造而成，側面睇係一位長者，從另一面睇就係一位青年，留畀觀賞者無限想像空間。
名雕塑家吳為山作品
書法了得嘅沈祖堯，親自喺雕塑前方嘅一塊名牌上寫上「融匯」兩字，佢話「青銅」代表中國，而「不銹鋼」就代表西方，正好體現傳統與現代的融合，別具心思。沈校長又逐一向五位贊助雕塑嘅校友致謝，包括張煊昌、殷巧兒、陳志新、梁英偉同一對無名氏伉儷。前往一睹雕塑風采的人，除咗一眾中大舊生外，仲有來自洛杉磯、北京同台灣嘅舊生，一同見證呢個歷史時刻。
雕塑家吳為山來頭不小，佢擔任中國藝術研究院中國雕塑院院長及美術館館長，曾創作嘅歷史人物雕塑多達五百幾件，當中不乏名人身影，包括齊白石、費孝通、荷蘭女王貝姬特麗克絲等，粒粒皆星。
吳為山亦曾為中大前校長高錕、創校校長李卓敏、新亞書院創校校長錢穆、諾貝爾物理學獎得主楊振寧同國學大師饒宗頤雕塑像。今次有緣製造「融匯」，相信不難成為中大新地標。
