政壇：搞搞政：蝦兵蟹將戰新西 泛民危危乎
泛民主派喺今屆立法會新界西選舉重創，得番四個議席，而一向係新西地頭蟲嘅白鴿黨更加因配票失敗而被「剝光豬」，一席都無。雖然泛民各黨銳意下屆捲土重來，但有傳各黨靈魂人物相繼退下火線，只剩低啲蝦兵蟹將出戰，估計泛民選情都係危危乎居多。
設計圖片及對白
雖然今屆新界西增加到九席，但泛民非但毫無進帳，仲因為配票策略錯誤而搞到輸凸，當中白鴿黨「高達」李永達同陳樹英呢對「夫妻檔」仲因互相搶票而雙雙落敗，反而公文袋郭家麒就因有黨主席抬轎而當選。
陳樹英夾乳鴿差一截
不過，下屆選舉卻存在變數，各新界西泛民議員嘅去留就成為一大疑問。首先講郭家麒，雖然佢之前曾做過醫學界功能界別議員，但由於佢為人不善搶議題出位，搞到做極都好似唔顯眼咁。見佢做足兩年立會都無乜起色，區內知名度又唔高，再加上下屆可能無紅人幫佢助選，所以來屆能否返回立會都係未知之數。
由於高達來屆唔會出選，改派太太陳樹英同「乳鴿」尹兆堅出選，但兩人多年專注地區工作，唔係好識得處理政策議題，同高達相比差一大截。雖然黨內近來銳意極速栽培兩人，大小議題都派出兩人攝位亮相，又搵尹兆堅負責處理泛民區議會協調工作，但兩人做咗多時依然無乜起色，如果再唔發力，兩年後能否幫黨重奪議席都係一大疑問。
至於李卓人、梁耀忠同陳偉業三人，由於泛民講明會否決政改方案，如果不滿泛民做法嘅市民改為投票畀建制派，三人又能否保得住個議席呢？加上李卓人捲入政治捐款醜聞，想連任真係要問過選民喇!
