政壇：吳永嘉自駕遊日蝦碌多
日本自駕遊樂趣多，但唔識日文嘅話，隨時笑料百出。好似中華廠商聯合會副會長Jimmy吳永嘉早前同太太暢遊日本名古屋，揸車由名古屋駛去松阪食牛羊，再去伊勢食龍蝦、生蠔，點知中途聽錯日文導航指示，走咗入掘頭巷。
肉質鮮甜嘅飛驒牛肉，售價比香港平一半。
吳永嘉狂食飛驒牛肉壽司，搞到肥咗幾磅。（受訪者提供）
首次自駕遊日本，唔識日文嘅Jimmy靠晒衞星導航，佢笑言日文唔難：「聽得多都估到幾成。」果然，頭幾日揸車順風順水，但直到第四日，考驗來了。話說有日佢邊開車邊同太太談心，將「轉右」的導航提示聽成係「轉左」，當架車駛到去掘頭巷先知出事。
蝦碌事陸續有來。話說有晚佢哋行入一間無英文餐牌嘅日本高級餐廳，品嘗一味牛脷後頓覺滋味無窮，Jimmy示意侍應再來一份，誰知送到面前嘅，竟然係一碗冷麵。指手畫腳一輪後，先發現睇錯餐牌。連食兩次「檸檬」，佢話痛定思痛，會認真學好日文喎。
