政壇：高佬賢聽阿媽話改名

講緊嗰個咪就係立法會漁農界議員「高佬賢」何俊賢囉！高佬賢喺兩年前進身議會，礙於功能界別選舉，佢當選時知名度極低，市民對佢嘅認識亦唔多。原來高佬賢「入行」前唔係叫何俊賢，本名係何文俊。

無喇喇做乜要改名呢？高佬賢透露，喺十五、六歲嗰年，媽咪幫佢哋三姊弟秤骨批命後，就想幫佢哋改名。

高佬賢有感本名係由父母賜予，媽媽要佢改名亦無反對，於是決定聽媽咪嘅話，新朵取名「俊賢」。但佢冇講到改咗名之後，運數係咪好咗喎？即係點呢？

之不過，當年高佬賢擔心忽然改名，會令身邊啲同學仔唔適應，所以佢一直將「俊賢」收埋咗，直至喺英國大學畢業後回港發展，先將「俊賢」公諸於世，之後仲改埋身份證中文名，咁先名正言順㗎，佢仲話依家只係得番屋企人，依然叫佢乳名「阿文」。

曾被叫錯「何俊仁」

對於傳媒幫佢取花名「高佬賢」，佢笑言黨友通常反諷叫佢「矮仔」或者簡單叫「高佬」，高佬賢仲自嘲知名度低，曾經有議員公開叫錯佢做「何俊仁」添！吓，唔係呀？好叫錯唔叫錯，叫錯佢做「AV仁」何俊仁，一個高，一個矮，差距咁大都認錯？

最近盛傳政府有意改組提名委員會，其中佔六十席嘅漁農界更係政府頭號「開刀」對象，唔知高佬賢會唔會考慮為漁農界秤吓骨，改番個牌頭趨吉避凶？