衙門各自為政 工程一誤再誤

係咁嘅，港鐵五條興建中嘅新支線工程全部延誤，超支涉及天文數字，當局賴天賴地賴人手，但有一點無得賴，就係消防處同勞工處各自為政，唔識轉膊，搞到外判商無所適從，工程受阻。

點解會咁？話說多個鐵路工程地盤一直使用消防處認可嘅電動油泵，為工程車及機械入油，從未發生過安全事故。點知近排勞工處失驚無神發通知，話呢啲油泵唔合規格，唔可以繼續使用喎。結果好多地盤焗住改用手攪泵入油，費時失事，怨聲載道。電動同人手，入油速度相差四倍，工程進度有乜理由唔拖慢吖，據講最少三條支線共十個地盤受影響，都咪話唔大鑊。

最離譜就係，勞工處同消防處各有各講，一個話電泵必須符合英國制式消防標準，另一個就話如果其他制式嘅性能同英國制式相若，亦可以使用。喂，官字兩個口，兩個衙門兩套標準，承辦商究竟跟邊個先？正如有立法會議員質疑，兩個部門之間溝通不足，消防處同勞工處都係政府部門，有乜理由一個政府兩個規矩吖？再講吖，回歸都超過十七年喇，殖民地時代就話英國制式大晒啫，唔通連呢樣嘢都係五十年不變？唔通其他國家嘅制式就唔安全？

其實，其他國家嘅制式一樣符合安全標準，而且英國產品貴一大橛，冇理由淨係選用英國制式，如果消防處同勞工處做足溝通協調，統一標準，承辦商又點會搞到兩頭唔到岸吖？納稅人又何至於要為工程延誤埋單吖？

講開又講，政府部門各自為政靠害市民，早就見怪不怪咯。早排發生嘅坑渠油風波，多個政府部門被踢爆把關不力，溝通不足，發牌還發牌，報關還報關，搞到漏洞百出，香港成為毒油主要源頭，咪就係一個典型例子囉。當局話香港冇生產食用豬油，但每年有過千噸食用豬油出口去台灣，當中擺明有蠱惑，當局居然矇查查，一直冇發現問題，你話港產官僚係咪失職吖？

計太一叮話齋，香港資本主義制度五十年不變就話係好事啫，港產官僚腦筋五十年不變，咁就大件事咯。消防處同勞工處食古不化，互扯貓尾，搞到港鐵工程一誤再誤，呢條數點計先？叮！