政壇：搞搞政：「工記吳啟華」空降港島有排等

有傳工聯會就立法會選舉已有部署，早前就話傳理事長、有「工記吳啟華」之稱嘅吳秋北可能會在下屆立法會選舉空降港島區參選，原來只係傳吓，據工記不成文規定，理事長身為工會「管家」，三年任期一做就要做三屆，所以，○九年上任嘅吳秋北照計最少要再坐多四年，所以空降港島睇怕要到二○二○年喇！

工記坐擁近四十萬會員，為確保呢個全港最大工會持續穩定，過去一直有不成文規定，據了解，會長同理事長嘅任期都長達九年，如果吳秋北未搵到接班人就貿然走到幕前，工記隨時「有前冇後」，況且吳秋北只係四十歲出頭，又未經歷過直選洗禮，不諳選舉工程，會成為佢參選一大障礙，「浸」多幾年再戰立法會或者勝算會更高。

嫻姐拒談會否裸退

至於循超級區議會當選嘅陳婉嫻，據工記耳語透露，兩年後嫻姐已經七十歲，無意再下一城，眾望所歸由王國興接棒，港島區議席空缺自然由郭偉強補上。我哋問過嫻姐係咪有意裸退，但佢顯然唔想多講，只係顧左右而言他。