學聯同學民思潮帶領一班學生搞罷課抗爭，前晚忽然衝入公民廣場，至尋晚都未平息。一班泛民主派遲咗十二小時去聲援學生，已經被批評離棄學生兼無政治道德，人稱「搞事四人幫」嘅壹傳媒老闆肥佬黎同「李漢奸」民主黨創黨主席李柱銘口口聲聲話愛民主，但就連現身「抽水」都嫌費事，尋晚七點鐘，兩人相約到中環食飯，歎夠兩個鐘先至施施然離開。

肥佬黎（中）同李漢奸（右）孖住食飯，懶理政總外罷課抗爭嘅學生。

捲入政治捐款醜聞嘅肥佬黎早前被廉政公署調查後，就同兒子漏夜搭飛機離港，懷疑係避風頭，之後香港政局一直風平浪靜。點知佢回港後，大專生咁啱又罷課，不但由靜坐演變到遊行去禮賓府抗議，前日學民思潮發起嘅中學生靜坐，更在臨近尾聲變成佔領政府總部，清場期間屢同警方爆衝突。不過，肥佬黎同李漢奸一直無現身，尋晚就約埋去開餐歎世界！

昨晚七時許，肥佬黎同太太及兒子在何文田家中乘座駕到中環歷山大廈一間餐廳食飯，食到九點半鐘，見佢同李漢奸夫婦施施然行出來，黎、李兩人似乎意猶未盡繼續有講有笑，之後李漢奸夫婦自行離開，而肥佬黎同家人就乘座駕返回何文田寓所。究竟兩人又密斟啲咩呢？莫非又密謀攪局？

第一手消息請下載on.cc東網iPhone/iPad/Android/Windows Phone Apps