政壇：學生搶風頭 哪吒白做
有人話，天時、地利、人和係謀事嘅成功必殺技。唔信？西貢區區議員方國珊（哪吒）尋日嘅活動可作一例，一向動作多多嘅哪吒，趁重陽節將至，尋日喺區內搞咗個活動，順便為佢哋個組織專業動力成功爭取嘅項目報喜。
設計圖片及對白
不過，尋日遇啱學生組織突襲佔領政府總部，全城焦點都瞄住金鐘，哪吒嘅活動要爭取曝光率真係唔易，難得搞個大龍鳳，竟然出師不利，哪吒有冇怨人呢？早喺大專生罷課開始，佢已經喺社交網站貼咗張陳年中大學生證，仲寫貼話要為校友打氣添！尋日一樣有校友參加，無計喇。
地區議員經常有好多地區服務，好多時佢哋都會出盡板斧，爭取媒體青睞、報道，既增知名度，又話畀選民聽佢做過乜。哪吒宣傳招數不絕，可以話喺區議員中較出位嘅一個，淨係反對將軍澳堆填區，佢就試過帶居民衝入立法會狙擊小組會議，又向與會者下跪陳情，甚至玩埋「淋血水」添。尋日，哪吒同專業動力又出動，原本係想趁周末新聞少，而下個禮拜四就係重陽節，仲唔係夾晒天時地利人和嚟宣傳？
發過貼撐師弟無計
點知，前晚罷課學生忽然發難，要重奪公民廣場，啲同學又通宵留守，尋日，再吸引大批立法會議員、政黨高層、泛民中人由朝到午落去抽水，全城聚焦政總一帶，其他活動想出頭真係唔易。
講開又講，大專生日前罷課時，哪吒已摷番一張九十年代嘅學生證，並將張相貼上社交網站，然後寫句為校友們打氣嘅貼子，為當日中大百萬大道嘅集會打氣，尋日又遇學生活動，可以點呢？
