業界缺新血延誤施工
【本報訊】「其實照計換機九個月就應該可以搞掂，要換成年幾真係太長。同埋剩底嗰部升降機本身係帶病工作，仲要加大負荷嘅話，一定會密啲故障。」香港電梯業總工會理事嚴傑雄解釋，升降機施工期歷時逾年，或與行業現時缺新血入行有關，「呢行收入同付出不成比例，令到依家合資格技工嘅人手唔夠，或因為咁而要多啲時間先搞掂。」
嚴傑雄又稱，更換舊機或涉在舊有圖則基礎上增加新設備，需時較長，故一般安裝全新升降機會較更換舊機容易，直言「如果搵番一開始裝部升降機間公司會好過搵個第二間，因為好多時個機械路軌可以五十年不變，可以用好耐，更新嗰陣只係換番啲錶板就搞掂、升降機門同埋機房機器，唔使嘥啲時間喺換路軌度。」然而，由於涉及承投工程問題，現時不少升降機的更換已非由當初裝置公司負責，以致影響更換時間。
