龕場大發死人財 入土為安何其難

講開骨灰龕問題，真係一肚氣。港府針對私營骨灰龕場亂象叢生，數年前推出「表一」及「表二」龕場名單作出識別，今年六月再推出《私營骨灰安置所條例草案》，建議發牌規管。殊不知，發牌制度未落實，私營骨灰龕場又有其他亂象出現嘞。

有關注團體調查發現，條例草案推出後，「表一」龕場因為符合地契條款及樓宇安全情況，將來好大機會獲得發牌，奇貨可居之下，飛擒大咬，坐地起價。嗱，好似沙田一間大型龕場咁，最低消費盛惠近十萬元，最高更達五十萬元添，問你點頂。冇得揀吖嘛，孝子賢孫只好退而求其次，幫襯售價較平但未必符合發牌資格、分分鐘可能被取締嘅「表二」龕場，損失金錢唔在講，搞到先人無處容身事大。

仲有呀，關注團體又發現，政府未有清楚界定骨灰龕位嘅性質，到底係「服務」吖，定係「財產」。咪以為兩者冇乜分別呀，差之毫釐，謬之千里，如果消費者買位自用，百年歸老之後，龕場未必保證「服務」可以延續；如果係「財產」，消費者係咪有權將龕位繼承或轉讓，一樣唔清唔楚。所以話，政府一味以為發牌規管就可以一了百了，其實魔鬼在細節之中，消費者到頭來未必有保障嘅咋。

冰凍三尺，非一日之寒。骨灰龕問題積重難返，講到尾都係前朝貪曾政府嘅錯。香港每年平均有五萬人去世，其中九成以上係火化，骨灰龕位每年需求至少四萬多個，但前食衞局局長周一嶽在任期間，公營龕場幾乎「零供應」，搞到「陰宅地產市場」風生水起，違規龕場遍地開花，你話前朝廢官係咪累人累物吖。

最令人激氣嘅係，面對私營龕場亂象，港產官僚進退失據，一時話毋須發牌規管，一時又改口要發牌；一時話全港十八區「區區有龕位」，一時又以地區人士反對為由，將計劃束之高閣，結果咪一事無成，亂上加亂囉。

點都好啦，根治骨灰龕亂象唔係冇辦法，就係增加供應，最怕弱勢政府百事哀，增建龕場講時容易做時難，叮！