城中鏡：Yelp網站攻港搵人吃喝玩樂
潮流興「點評」，餐廳、服務、產品乜都評一餐，美國最大點評網站Yelp最近登陸香港，仲打算開設「筍工」一份，聘請專員專責吃喝玩樂。
Yelp新興市場副總裁Miriam Warren話香港係第二個進軍嘅亞洲市場。
Yelp推出嘅香港版網站，所有人都可以建立自己嘅帳戶成為「Yelper」。Yelp新興市場副總裁Miriam Warren話，香港係繼日本之後第二個進軍嘅亞洲市場，佢哋每進入一個市場都會請一個本地「社區經理」，由佢發掘出最地道嘅美食或者好去處，之後就喺網站上面撰寫評論，同向外推廣Yelp網站，建立起本地嘅「Yelp社群」。
「筍工」待遇賣關子
Warren都係做「社區經理」入行，工作可謂相當精彩，「今日下午去試不同嘅酒吧，聽日就喺電視介紹情人節慶祝熱點，或者周末會到本地農市場推廣一下Yelp嘅手機App，每日都可以試新嘢，如果係鍾意四圍飲飲食食就最適合。」
至於呢份「筍工」嘅待遇係點？佢大賣關子，但成為Yelp嘅一分子就可獲分公司嘅股票。Yelp曾經畀Google同雅虎睇中想收購，雅虎出到十億美金都畀Yelp拒絕。Yelp前年三月喺紐交所上市，股價表現仲相當靚仔，累積升幅超過一點九倍。想搵筍工嘅「食評家」不妨留意住Yelp嘅港版網站啦！
