尋日喺一個慈善晚宴見到前港姐Cally鄺美雲。向來熱心於慈善工作嘅佢，為幫助數千名弱視兒童籌款出心又出力，佢話：「今次捐咗幅畫拍賣。雖然幅畫唔係親手畫，但係我嘅收藏，主題係講母子情。因為籌款晚宴嘅主題係1920年歌舞劇，所以嘗試吓整呢個復古造型。」

馬德鐘同太太張筱蘭同樣配合歌舞劇主題以復古造型示人。

為幫助數千名弱視兒童籌款，Cally出心又出力。

咁係咪喺內地義捐興建多間學校呀？Cally話：「有五十幾間學校，有間仲起緊，不過就冇特定興建地點，邊度有緣有需要就起，亦有人會主動揾我。我都有去探訪，出席學校開幕典禮，自己都有喺香港懲教署教授課程，向在囚人士分享自己心得，點樣可以活得精彩。」

囝囝唔識黎明 馬德鐘代澄清

另外，藝人馬德鐘同太太張筱蘭恩愛亮相，同樣以復古造型示人，配合歌舞劇主題。馬德鐘透露係特意嚟支持太太，因為太太係慈善晚宴嘅籌委會主席。

問到太太張筱蘭喺微博上指囝囝馬在驤並唔認識黎明，佢為囝囝澄清，話：「佢讀國際學校，外國明星會知，但本地唔熟，加上兼顧學業都冇時間，我嘅劇集都係抽空睇。」被追問係咪睇唔起黎明？佢話：「梗係唔係，冇時間睇啫，佢仲細，年少無知，咁大明星都唔知，要打佢籮柚。」張筱蘭又自認係黎明嘅粉絲：「自己都係Leon粉絲，屋企有佢好多CD，得閒要畀佢（囝囝）聽。」

第一手消息請下載on.cc東網iPhone/iPad/Android/Windows Phone Apps