城中鏡：伍燕梅愛心爆棚幫魚做手術
話說早前澳洲有獸醫成功幫一條金魚開腦切除腫瘤，延長該魚嘅壽命二十年，但原來喺香港就好難搵到獸醫肯幫魚做手術。尋日喺九龍總商會嘅新書發布會上，遇到香港錦鯉會會董兼九龍總商會公關部副主任Lyraa伍燕梅，佢話魚會經常感染唔同疾病，好似魚腮同魚肚附近生腫瘤就最常見，如果唔想睇住愛魚死就要靠自己喇！
陳新滋（左）原來係李光華（右）嘅中學師兄。
伍燕梅話唔捨得啲魚病逝，靠睇書吸收經驗。
國際專業保險諮詢協會會長羅少雄話，香港有外資公司提供寵物保險。
愛魚嘅Lyraa話其實魚同其他動物一樣認得人，養耐咗一樣會好有感情。唔捨得啲魚病逝，惟有靠睇參考書吸取經驗，同魚友夾手夾腳幫患病嘅魚做手術。雖然失敗嘅經驗少不免，但佢哋亦累積咗好多成功經驗。同場讀理科出生嘅浸會大學校長陳新滋就話，魚嘅結構比其他動物簡單，所以技術上應該唔會太困難喎。
商會出書講75周年發展史
有次Lyraa朋友見到條魚生癬，諗住用人類嘅藥物幫佢醫治，點知一滴啲藥落水條魚即死，陳新滋就話好可能係藥嘅分量太重，令體形細小嘅魚類難以承受。此外，魚都有HIV，每次啲魚一出去比賽完或同其他魚養埋一齊就特別容易出事，一感染就成缸魚一齊死，所以Lyraa養魚好小心，一噸水嘅空間只養一條靚錦鯉。
講番個新書發布會，九龍總商會理事長Conrad李光華原來同陳新滋係中學校友，師弟擔大旗籌備出書紀念商會七十五周年嘅發展史，身為師兄當然要來捧捧場啦。Conrad透露，陳新滋中學成績非常突出，喺校內無人不識；又話當年有個生物科老師又靚又叻又後生，佢哋二人都非常崇拜呢位靚Miss，原來呢位靚Miss尋日都有到場默默支持。
