自從政府總部由中環搬去金鐘添馬艦後，連帶一班公務員都感到「搵食」艱難，所以政府總部飯堂就成為佢哋嘅醫肚之地，而早前講過政府為飯堂進行招標，而產業署以「價高者得」通知飯堂李老闆唔中標，飯堂做埋聽日就結業嘞，咁公務員事務局局長鄧國威同埋班公務員又會轉去邊搵食呢？

設計圖片及對白

據知由經營多間警署飯堂嘅公司接手，但新飯堂最快要一個月後先可以開張，即係話一班飯堂捧場客有成個月要出外搵食，除咗要同其他金鐘上班族一齊逼外，大熱天時外出都咪話唔辛苦。

「特別特首」貪曾唔幫襯

本來班公務員可以近少少行過去中信大廈都搵到連繫快餐店，但點知又撞啱間快餐店裝修，據聞呢間快餐店嘅燒味飯係公務員至愛，睇嚟未來一段時間都無啖好食兼要捱貴飯喇！

飯堂老闆李先生早前講起經營三年以來有成肚氣，除咗做開荒牛之外，喺年底仲發現政總連同立法會爆發退伍軍人症，佢慨嘆當時生意足足跌咗一半，曾諗過摺埋退出，但最後都決定繼續留低。佢話當時曾寫過大字報控訴，點知「貪曾」前特首曾蔭權爵士在任時喺門口望咗一望就走咗，至落任前都冇去過幫襯，諷刺貪曾係「咁特別嘅特首」。

第一手消息請下載on.cc東網iPhone/iPad/Android/Windows Phone Apps