政壇：馬雲新橋妻網購夫找數
女人錢易賺，商業奇才阿里巴巴集團主席馬雲深明此道，阿里唔單止有極高比例嘅女性客戶，最近又度到新橋，其關聯支付寶推出「親密付」，方便老公為上網購物嘅太太找數。
馬雲
70%買家係女性
「親密付」係支付寶8.3版嘅主打新應用程式之一，其作用係令支付寶可提供類似附屬卡功能，使用戶可代子女、父母又或者另一半，進行網購等嘅電子支付。由於「親密付」最高支付限額每月可達二萬元人民幣，唔少內地網民都話，這項新功能可以作為「感情試金石」，可試驗自己另一半，願意為自己承擔多少「網購簽帳」。
女性網購一向係內地電商發展嘅主要動力，馬雲喺紐約出席「克林頓全球倡議（GCI）」年會時亦話「我要感謝女性，沒有你們阿里不可能成功到紐約上市」。
女性威力有數據支持，阿里嘅買家中有百分之七十係女性，包括淘寶店主在內嘅賣家亦有百分之五十係女性，更同時大談電商發展如何能協助女性創業。馬雲更笑言，由小微金融負責嘅阿里小貸「較為傾向貸款予女性，因為她們更為可靠」。佢嘅說法，唔單止打動阿里嘅女性買家，就連在場嘅克林頓夫人、美國前國務卿希拉妮都拍爛手掌。
