政壇：盛智文爆許仕仁差啲掌海洋公園

做咗十一年海洋公園主席嘅「扮嘢文」盛智文，講到早前離開呢個位，當然唔捨得喇，除咗大呻只得三星期通知，走得太急外，尋日出席一個政黨青年團搞嘅歡樂時光派對時又再爆料。佢透露，當年政府高層曾經先後六次搵佢做海洋公園主席，話如果佢唔肯做，就會畀前政務司司長許仕仁做喎。

本身經營餐飲業嘅扮嘢文話，雖然當年政府高層「六顧草廬」打電話搵佢做海洋公園主席，都未能令佢心動，點知該名高官講咗句話「你唔做就可能叫許仕仁做喇」，就令佢即時應承。佢講笑話，擔心許仕仁上場後將海洋公園資產賣晒出去，然後用來起樓，所以寧願硬住頭皮試吓都唔想畀許仕仁做喎。

喺酒吧搞得歡樂時光派對，參加者梗係叫番杯酒飲吓啦，但扮嘢文係唔飲酒嘅，所以尋晚只係以水代酒，所以佢爆料絕對唔係飲大兩杯，係喺清醒情況下講出嚟嘅。