政壇：收捐款議員 低調避風頭
學界罷課本周一正式展開序幕，但泛民主派二十七名議員首兩日只有零星嘅人上台撐罷課，尋晚現身嘅更係要人三催四請先至蒲頭，特別係多名收受肥佬黎政治捐款嘅議員都低調現身，就連捐款醜聞主角肥佬黎喺呢個政改關鍵時刻仍未有在港現身，真係唔知去咗邊。聽聞廉政公署今次調查政治捐款醜聞唔係講玩，一干涉事人等隨時要上身，莫非佢哋自己知自己事，所以要玩低調避吓風頭？
設計圖片
肥佬黎過去兩年向泛民議員和政黨團體，秘密捐款逾四千萬元，廉署經過一輪調查後迅速行動，首先到肥佬黎寓所調查，其後肥佬黎到廉署總部受查，其左右手Mark Simon隨後亦到廉署。據報李卓人都到過廉署，泛民多名有收取同被指有收過肥佬黎政治捐款嘅議員更係人心惶惶，由以往頻頻高調現身說三道四，改為陸續奉行低調政策，其中泛民眾生相喺學界罷課一事更係無所遁形。
據聞泛民二十七名議員現身首兩日罷課集會嘅人數不足一半，即使有現身都無高調撐罷課，而涉及捐款醜聞嘅議員中，最高調撐罷課嘅就只有「長毛」梁國雄。「搞事四人幫」方面，肥佬黎同「民主阿婆」前政務司司長陳方安生更加做咗罷課「失蹤人口」，而外號「李漢奸」嘅民主黨創黨主席李柱銘尋日下午更自稱只係「路過」現場，驚人誤會以為佢去撐罷課咁。
三催四請 李卓人始現身
不過，尋晚集會期間就突然多咗泛民議員現身，但咪以為佢哋自發去撐罷課，有知情人士就爆料話，其實係學界發表公開信邀請全體議員出席，換言之佢哋都係三催四請先肯上台講幾句，包括李卓人、「AV仁」何俊仁等人。期間仲發生一段小插曲，當AV仁上台發言時，台下起初有零星起哄，有人更嘲諷白鴿黨賣港。
不過，捲入政治捐款醜聞嘅議員唔低調得好耐，因為立法會議員利益監察委員會下月六日將再次開會，討論係咪跟進泛民議員收取肥佬黎政治捐款有無利益衝突一事。
據聞係咪正式調查事件，關鍵在於泛民會否「護短」，事關委員會合共由七人組成，撇除委員會主席，建制泛民各有三名委員，如果支持反對票數一樣，委員會主席將按慣例投反對票，如果真係唔調查睇怕有排解畫嘞。
