蒲台缺水又缺電 島民有苦無處訴
蒲台島素有「香港南極」之稱，風景優美唔在講，仲有唔少奇岩怪石，簡直係人間淨土。可惜吖，港府有眼無珠，對小島不屑一顧，搞到小島醜聞纏身，唔係淪為水警蛇王勝地，就係淪為千墓島。呢，家陣醜聞又多一筆喇，原來島上居民長年缺水缺電，好似孤兒仔咁被港府遺棄，自生自滅，你話係咪慘吖。
講都冇人信，四十戶蒲台島居民竟然長期缺水缺電，過住與世隔絕嘅生活。七十歲嘅鍾婆婆係咁講嘅，全島得三部由民政事務署提供嘅發電機，居民要自行購油發電，一度電費高達六蚊，貴過市區多多聲。為咗慳電費，居民每日傍晚六點後先有限度供電，因為電壓不足，開咗風扇就睇唔到電視，開咗電視就吹唔到風扇，舊年仲試過發電機故障而停電一星期，問你點頂。
咁仲唔止，由於島上冇食水供應，全島居民靠兩個水井收集雨水使用，有時連去完廁所都冇得洗手。到咗冬天旱季就更大鑊，只能依靠政府派船運水，點知政府好做唔做，三個儲水箱全部係塑膠製，長期暴曬下隨時釋放有毒物質，加上從來冇人清洗水箱，搞到島民唔敢用水，老人家只好攀山涉水自行收集山水，簡直靠害。
好嘞，可能政府都知衰啩，尋日終於派員同島上居民會面。政府代表承認，島上電力僅夠二十戶使用，會同電力公司商討，又話水務署計劃於偏遠村落建地下水系統，現正招聘顧問，年底進行研究喎。喂，難聽啲講句，島上居民都上咗年紀，當局商討又商討，研究復研究，公公婆婆分分鐘等到死都未等到有水有電嘅一日啦。港產官僚一味耍官腔，歎慢板，到底有冇誠意解決問題，唔使問都知喇。
講起就激氣嘞，蒲台島因為人煙稀少，港府嫌供水供電欠缺成本效益，長期置之不理，其實係認錢唔認人，唔通島上居民唔係香港市民咩？講真吖，蒲台島景色秀麗，海產豐富，大力發展嘅話，一樣可以吸引旅客o架，如果唔係，幾年前又點會發生轟動一時嘅水警集體蛇王食海鮮醜聞吖？家陣蒲台島淪為非法骨灰龕場，香港南極變得烏煙瘴氣，咪就係港府放任自流嘅惡果囉。
講到呢度，太一叮有個建議，內地最流行官員到地方調研，港產官僚不如照辦煮碗，下放去蒲台島體驗一下，話唔定針拮到肉知痛，可以一改死拖爛拖嘅施政陋習，叮！
