城中鏡：鄭兆良將信仰融入時裝
著名時裝設計師Barney鄭兆良日前出席時裝發布會，話呢個活動係同六名設計師合辦，非常有意義，佢話：「呢度匯集咗同一信仰嘅基督徒，希望將創意、工作、生活同信仰混合一體先發起呢個活動，最想提一樣嘢係雖然我哋六個設計師嘅風格都唔同，但相同嘅一點係同樣咁熱愛神！」
鄭兆良（右起）、張路路、朱潔麗及Enoch Ho將個人信仰融入時裝設計。
婚紗經文圖案表現「愛」
Barney透露，首次以帶頭人發起呢類活動，希望日後有更多機會同時間籌備當中嘅細節，又話：「我哋暫時計劃喺一年半後，會再搞一個時裝同信仰嘅時裝匯演，呢次其實準備咗個幾月咋，所以好多謝各界人士幫忙，簡直係如有神助，Mission Impossible！」
同場嘅婚紗設計師Noel朱潔麗就話信仰係豐富自己作品嘅重要元素，非常感恩，又話：「我做婚紗設計咁多年，有時真係為設計而設計感到迷失，設計路唔持久，但當有信仰後，設計品變得好有意義同生命力。」佢又話信仰畀咗自己好多智慧嚟設計新產品：「好似今次設計嘅婚紗，衫上面係有加入經文同圖案，表現愛嘅情感，希望將信仰同美學糅合，畀到人新鮮感。」佢又話：「好開心大家咁合拍同齊心去做好呢件事，可以用自己嘅潮流觸覺去演繹心中信仰係好難得！」
時裝設計師LuLu張路路亦抽空撐場，稍後佢又要飛往其他地方工作，佢話：「雖然好忙，趕頭趕命，但可以喺自己嘅作品入面呈現靚嘅感覺出嚟，真係忙得好開心！」
