設計圖片及對白
有「老人俱樂部」之稱嘅建仔，早前傳出主席「譚Sir」譚耀宗會跟隨曾鈺成、陳鑑林等一眾元老，玩埋今屆全面引退，其中譚Sir喺新界西嘅繼任人眾說紛紜，包括身兼黨副主席嘅陳勇同青年建仔主席周浩鼎等，其中尤以陳勇呼聲最高。雖然新社聯出身嘅陳勇近年極速上位，但始終新社聯票源集中元朗、北區，民記嘅屯門、荃灣等地區支部未必肯心甘情願去撐佢。
加上隨着新社聯喺新界勢力日益壯大，其中新界西議員梁志祥同陳恒鑌都持有新社聯同建仔雙重身份，如果陳勇當選埋，新社聯風頭隨時蓋過建仔，要建仔靠邊站肯定唔制。至於譚Sir嘅愛將周浩鼎，就因為該黨元老黃定光早已放風，有意提拔周浩鼎接任進出口界功能界別議席，所以周浩鼎接譚Sir棒似乎係流料居多，剩低只有陳勇一個選擇。
恐毀長城 或得個吉
不過，有口痕友就爆料，話黨內屯門支部不滿，寧願推舉當區「大佬」陳雲生都唔肯益新社聯，第二梯隊亦可趁機上位。難怪陳雲生近期出奇咁積極，頻頻曝光。不過，陳雲生參選知易行難，表面上單靠屯門幾條屋邨嘅選票就想更上一層樓，似乎有啲難度，除非該黨新界西總動員全力谷佢當選啦。
據知譚Sir經過綜合分析，與其推「雙陳」出去做炮灰自毀長城，寧願自己高票冧莊力保新界西三席，所以建仔班細嘅搞完一大輪都係得個吉，睇怕第二、三梯隊上位之日遙遙無期，等完四年又四年。
第一手消息請下載on.cc東網
