設計圖片及對白
班議員就嚟放完一個悠長嘅暑假，事關立法會嚟緊十月復會嘞！如果回顧番上年度最經典場面，首推財務委員會主席「星爺」吳亮星處理新界東北發展前期撥款時，遇到泛民主派不滿嘅挑戰。未來一年輪到飲食界Tommy張宇人做財委會主席，正當大家期待Tommy有乜嘢板斧阻止激進派議員「拉布」時，佢就話目前最大挑戰係自己，因為想開會前減多幾磅先喎！
因乜解究做財委會主席同減肥有關？做主席唔係好辛苦咩？Tommy解釋，正正係同「辛苦」兩字有關，佢話前年佢出掌財委會主席時，個個朋友都擔心佢太辛苦，經常請佢食好嘢，食完好嘢當然又要飲靚酒，搞吓搞吓體重就直線上升，所以佢發現過去幾年最重「分量」嘅時間，正正就係做緊財委會主席嘅時候。
頭痛議題排住隊嚟
正因為咁，Tommy要喺財委會復會前減磅，但佢本身都唔係特別肥，點解要咁勤力去減呢？Tommy話因為過多幾日約咗班老友飛去法國波爾多飲靚酒、歎美食，到時一定肥好多磅，但面對美食又好難戒口，所以呢幾日要努力下苦功，希望將體重保持喺一百七十幾磅左右，就算喺法國大飲大食都有啲位走盞。
無論減唔減到肥，財委會都會好快復會，頭兩項撥款將係廚餘中心同三堆一爐，相信單係呢兩項工程撥款都足以令Tommy夠晒頭痛，唔知Tommy到時點樣拒絕啲老友啲慰勞美食呢？
第一手消息請下載on.cc東網
