小販市場無水食署翻新嘥錢

斥資二千一百萬元的荃灣鱟地坊小販市場改善工程完成僅一年半，卻遭檔戶怒轟新不如舊，不但通風欠佳兼且全場無水供應，導致人流大跌。面對惡劣營商環境，每日飽受日曬雨淋的檔戶大嘆生意難做，食環署視而不見。立法會議員與區議員狠批食環署設計不善浪費公帑，要求立即研究改善方案，還檔戶一個合理經營環境。

市場採用天幕設計，未能遮擋陽光，加上通風系統欠善，令環境異常翳焗。

黃婆婆（右）每天帶水桶、過兩條馬路到附近街市取水。

葛兆源（左）與麥美娟以溫度計測溫，度出場內溫度高逾三十四度。

檔戶炮轟
香姐（賣民族服裝）：「企出面仲舒服啲，入面真係好焗，開風扇都唔掂，夏天人流少好多！」

牛哥（賣褲）：「之前應承會有水喉，依家整完反而冇水用，又冇宣傳，少咗成三分一生意！」

「個新設計完全遮唔到太陽，食環署又唔畀整簷篷，啲衫雖然套咗膠袋、仲用布遮住，但都曬到甩晒色，搞到賣唔出蝕大本！」售賣女裝的李小姐指，小販市場換上天幕設計後，檔攤變成「好天曬落雨淋」，通風系統欠善，翳焗程度難以忍受，客人全無意欲入內，生意額大跌。

完成工程零宣傳

至於經營童裝的黃婆婆則對市場內未有供水深表不滿，「朝朝早開檔都要拎住個水桶、走兩條馬路去街市廁所排隊拎水，一來一回都用咗九個字，仲要畀街市啲人鬧！阿婆幾廿歲都唔想咁辛苦抽水，但冇水點做嘢？」另外，亦有租用市場外圍攤檔的商戶表示，每逢下雨檔攤附近便乍現「水柱」，嚴重影響生意。

「食環署承諾過工程完晒就會有水供應，但依家又反口話唔整！我問過水務署都話可以供水，咁食環嘅理據係乜？」當區區議員葛兆源直斥食環署違反承諾，無視檔戶慘況，要求盡快作出改善。葛又稱，工程完成後當局一直「零宣傳」，不少街坊熟客甚至以為市場已告關閉，而翳焗環境更是市場人流大降的元兇，直斥翻新工程「唔做好過做」。