危險招牌半空掛 屋宇官僚懶執法
天有不測風雲，人有旦夕禍福，唔係靠嚇o架。呢，全港違例招牌多達十二萬個，唔少仲係日久失修，搖搖欲墜，行行吓街隨時禍從天降。屋宇署話就話推出自願申報違例招牌計劃亡羊補牢，點知反應冷淡，成效近乎零。「東方報業民意調查」顯示，大部分受訪者直斥屋宇署執法不力，做嘢馬虎，係都市炸彈遍地開花嘅罪魁禍首。
大家都知，○八年灣仔一間餐廳嘅大招牌突然倒塌，壓死一名女途人；去年底旺角又有個巨型招牌吊吊揈，搞到彌敦道交通癱瘓。仲有呀，日前八號風球「海鷗」襲港，唔少大型招牌吹到左搖右擺，險象環生，好彩冇搞出人命咋。可能屋宇署都知驚啦，去年九月推出自願申報計劃，只要招牌持有人提交證明書證明招牌安全，即使未經審批嘅招牌都容許保留。計劃原意係好嘅，可惜事與願違，爛尾收場。
冇花冇假，截至今年八月，屋宇署都係收到七十二份申請咁大把，即係佔全港招牌零點六個巴仙，仲要只有十五份獲確認，實際成效近乎零。點解搞成咁？之唔係因為港產官僚人頭豬腦囉。正如前線測量人員話齋，要求違例招牌業主自願申報，等於自投羅網，邊會有人咁蠢o架。再講吖，當局宣傳不足，好多商戶連聽都未聽過相關計劃，又點會有成效喎。
聽吓市民點講啦。「東方報業民意調查」顯示，四成五受訪者直斥有關計劃非強制性，形同虛設；兩成七批評要違例者自首，難有成效；兩成四認為宣傳不足，少人知。喂，一般市民都睇得出計劃漏洞多多，偏偏港產官僚成個牛皮燈籠咁點極唔明，計劃唔爛尾收場就奇嘞！咁仲唔止呀，屋宇署最衰嘅係連日常檢控都放軟手腳，今年首七個月只係發出七十六份違例招牌清拆令及通知書，比去年同期大減逾四成。市民梗係睇唔過眼，三成五受訪者批評屋宇署無配合計劃加強執法；三成四指摘取締違規招牌得個講字；兩成七直斥處理違例招牌歎慢板。
講開又講，都市炸彈無處不在，其實同前朝貪曾政府有關。貪曾○九年以刺激就業為名，撥款予屋宇署清拆五千個危險招牌，原來一直紙上談兵，違例招牌個案就愈積愈多，簡直靠害。點都好，香港自詡係安全城市，咁就唔該屋宇署快啲做嘢，咪搞到要市民戴鋼盔行騎樓底吖，叮！
