城中鏡：蘇陳偉香 陳肇始「家己冷」啱傾似姊妹
仁濟醫院尋日喺沙田馬場舉辦仁濟盃賽，一眾董事局成員及嘉賓早就到場，仲預備咗一個大大嘅蛋糕，為八至十月生日嘅總理切蛋糕慶祝，非常溫馨。期間見到仁濟主席蘇陳偉香同食物及衞生局副局長陳肇始傾得特別投契，望真啲，兩個人仲好似樣添。原來二人係同鄉，唔怪得特別啱嘴形。講起二人笑容一致兼非常有姊妹相，蘇陳偉香就話已經唔係第一次有人咁同佢哋講，好似食物及衞生局局長高永文咁，就曾經話過佢哋似樣，加上佢哋二人都係潮汕人士，大家「家己冷」，輪廓有所相似及特別啱傾不出奇。
主席蘇陳偉香（左）及陳肇始（右）笑容一致。
總理蔡寶健（後）與太太（左）及囝囝一家三口一齊出席盃賽活動。
同場仲有仁濟總理Jenny陳李詠詩同身兼仁濟總理及Bannershop主席及行政總裁嘅Anthony蔡寶健。講起前排因為熱炒新出嘅智能手機，令一眾打工仔於上班期間為之瘋狂，Anthony就話佢當時開緊會，所以冇參與網上出機行動，但知道其他職員喺辦公室都撳得好興奮，冇諗過阻止佢哋，笑言想阻止都阻止唔到，加上只係一段好短嘅時間啫。而Jenny雖然冇炒，但亦將於今日上台出部新機用。
