本來喺八月十五日生日嘅「九巴後人」雷禮權,前晚喺深灣遊艇會舉行「遲來的」生日派對,佢話由於正日好多朋友唔喺香港,所以咪延期搞囉。雖然有朋友指生日後先慶祝唔吉利,但佢就係唔信邪。問到生日願望?佢話:「身體健康,冇健康冇得玩。」

雷禮權(左起)、雷兆光同太太雷林靜怡喺派對玩得好開心。

雷正殷話畫咗張卡畀爸爸做生日禮物。

葉梁美蘭着住由即食麵包裝袋做嘅裙出席生日派對,搶盡風頭。

葉梁美蘭即食麵袋做裙

今年派對更以顏色為主題,佢坦言:「我之前諗過以平靚正做dress code,用338蚊包晒由頭到腳到內衣嘅打扮,但好多朋友打嚟問我意見,我畀晒啲提議佢哋,咁到我唔知着乜,最後就改題目。」佢笑言喺會場安排咗一條catwalk天橋,要賓客表演貓步由佢評分,頒發最佳同最差衣着獎。

名媛葉梁美蘭就以即食麵包裝袋做裙出席生日派對,佢話早喺六月,雷禮權就叫佢準備,佢花咗四個月時間,全家出動共吃咗一百五十包即食麵先完成今次裝束,事關主人家話全套裝束唔可以過338蚊。但係dress code改咗另一個喎?佢話:「佢(雷禮權)之前係咁同我講。件衫係我構思,再搵人將包裝袋貼上去。」

雷禮權嘅囡囡雷正殷喺生日派對中負責表演唱歌,佢透露喺英國倫敦讀大學二年級,主修音樂,派對翌日就要返回倫敦開學。問佢送咗乜嘢禮物畀爸爸?佢話:「畫咗張卡,正日生日一家人食飯慶祝。」

另一家族成員雷兆光同太太雷林靜怡,為切合大會以顏色為主題嘅衣着要求,雷兆光一身彩色打扮,佢話:「我呢個造型係Hip Pop DJ,其實之前冇諗過,都係即日下午先去連卡佛買衫。」問到雷林靜怡點解冇同老公襯成一對,佢話:「我邊有佢咁好心機,由頭襯到落腳,好似話唔跟衣着要求會被罰上台行catwalk,我未見過老公着開襠褲,好新潮。」

第一手消息請下載on.cc東網iPhone/iPad/Android/Windows Phone Apps