政壇：搞搞政：建制七成民意論 官場中人呻倒米
由於泛民主派誓言會否決政改方案，令二○一七年特首普選能否落實命懸一線。有重量級建制派人士早前提出「急救」方案，聲稱如果可以將目前有五成多市民支持「袋住先」嘅民意，進一步谷高到有七成，相信就可令泛民回心轉意投票支持政改。不過有官場中人形容呢個「七成民意論」擺明靠害，因過去幾乎無一項政府政策可以爭取到七成民意支持，反而有多達七成人反對某項政策就有好多例子。再者即使真係有七成民意支持「袋住先」，亦唔代表泛民會就此轉軚，質疑呢位建制派人士好心做壞事，變相幫政改倒米。
設計圖片及對白
二○一七年特首普選方案，不論係坊間由政黨或學術機構做嘅調查，以至政府私下進行嘅民調，結果都係贊成「袋住先」嘅市民暫時居多。其中官方嘅民調顯示，對於人大常委會規定普選特首候選人必須取得提名委員會過半數支持、以及將候選人數目限制於二至三人，基本上都有超過五成市民支持，反對嘅大約有三成多至四成。
預計攀升不切實際
官場中人預計，隨着政改爭拗愈演愈烈，罷課佔中輪流爆發，預計有關支持度只會跌多升少，要將「袋住先」民意攀升至七成根本不切實際。
另有官場中人更指出，就算政府啲宣傳攻勢奏效，到立法會表決前夕谷到有七成民意支持方案，要白鴿黨等溫和泛民「華麗轉身」，機會仍然不大，因為呢七成「袋住先」民意中，好可能有四至五成本身係建制派支持者，無論政改方案過定唔過，佢哋都唔會投票支持泛民；另外一至兩成則可能係沉默大多數，根本就唔會出嚟投票；最後會因溫和泛民轉軚而投票畀佢哋嘅，可能不足一成，不如繼續企硬反對，再同激進泛民爭奪反對「袋住先」嗰三成民意好過。總之喺今次人大框架一出，政府上下都已對政改原地踏步、未來管治舉步維艱有晒心理準備。
