本報早前獨家報道,政府建議將立法會現有五大直選選區劃細做九個,白鴿黨議員胡志偉當日接受電子傳媒訪問時,即時表示反對有關建議,但其實白鴿黨曾經向當局提交意見書提議劃細選區,該黨前主席「AV仁」何俊仁當晚亦特意向傳媒澄清,話佢哋已經講咗杯葛政改第二輪諮詢,因此唔會評論有關建議,令人質疑該黨精神分裂。

胡志偉

原來呢個故事仲有下文,話說黨內亦有人覺得胡志偉嘅講法同該黨一貫立場有別,尤其係人都知道劃細選區對白鴿黨有百利而無一害,冇理由公開倒自己米,因此喺某次內部會議中要求胡志偉澄清。胡志偉喺會上解釋,其實佢並非一刀切反對劃細選區,而係純粹反對「五變九」方案,認為若果選區劃得太細,多個選區大幅減至只有三或五個議席,配票能力較高嘅建制派應可在有關選區取得過半數議席,對整體泛民極為不利,可惜電子傳媒最後只報道佢反對劃細選區,令人產生誤解。

黨友接受解釋

黨友聽完之後,都接受胡志偉嘅解釋,但大家都覺得冇需要公開發稿澄清,結果令外人繼續以為胡志偉亂噏,甚至質疑白鴿黨為反對而反對。胡志偉下次講嘢真係要小心啲囉!

第一手消息請下載on.cc東網iPhone/iPad/Android/Windows Phone Apps