劉慧卿話要有出入自由至會踏足內地。
立法會北歐考察兼交流團尋日結束訪問行程返抵香港，立法會秘書處一早搵定旅遊巴喺機場貴賓室等候尊貴嘅議員，議員們一踏出機場貴賓室時就遇上傳媒嘅閃光燈，受寵若驚之後，至知傳媒閃嘅係工商專業訪京團成員出發，而唔係採訪佢哋回歸。
謝偉俊一身紅衫襯紅帽打扮，十分搶鏡。
四議員無跟大隊返
北歐團原本有十名議員參加，不過現場所見，只有五名立法會議員有坐旅遊巴離開，分別係白鴿黨劉慧卿、工黨何秀蘭、資訊科技界議員莫乃光、建仔嘅葉國謙同獨立謝偉俊，另外工聯會麥美娟則有人以私家車接送，換言之有四名議員無跟大隊返港，估計好大機會係因利乘便，趁機留喺當地玩多幾日嘞！
至於身為白鴿黨主席嘅卿姐，甫抵港就要回應該黨係咪參加全體立法會議員下月訪問廣東省，卿姐話未同黨員討論此事，但再三強調自己係永遠唔會踏足內地，除非可以自由進出喎。
第一手消息請下載on.cc東網
